政情：和仔踩入鄉會唔從政

足球先生李健和殺入政壇。坪洲鄉事會街坊代表日前舉行選舉，早前連傳負面消息嘅鄉事委員會主席林偉強被「倒強派」力壓，焗住裸退。「倒強派」就選情報捷，首次當選為街坊代表嘅和仔更成眾人焦點。不過，和仔話，對從政一啲興趣都冇，仲斬釘截鐵咁話對明年三月鄉委會嘅換屆選舉毫無興趣。

和仔日前以九百零三票當選為坪洲鄉事會街坊代表，得票排第五，對初次參選嚟講，呢個成績算唔錯。人人都以為和仔會喺政壇大展拳腳，但原來只係一場美麗的誤會。和仔尋日同我哋講，佢認為坪洲需要一啲新轉變，咁啱又有啲年輕嘅街坊代表向佢招手，佢先參加今次選舉：「講真，我對從政真係興趣不大！」

和仔仲話，佢冇興趣問鼎下屆鄉委會嘅正副主席一職，事關認為責任太大，自己既無能力，亦無時間參與。咁又有冇興趣連任下屆嘅街坊代表呢？和仔就話到時可能有啲比佢更好嘅人選，街坊都唔使要佢喎。