政情：逢周六日OT林鄭好捱得
政情：逢周六日OT林鄭好捱得
好多官場人士都怨工時長，發展局局長林鄭月娥有「好打得」之名，佢尋日喺立法會一個會議上講到自己嘅工作，不經意披露佢嘅工時都好長，或者呢個就係佢打得嘅秘訣之一。
立法會發展事務委員會尋日討論中區「政府山」發展，但啲議員就輪住向林鄭申訴，話收到有關舊樓收購同強拍條例嘅投訴愈來愈多，擔心民怨會愈來愈深，林鄭即刻拍心口保證會不停監察，仲豪氣十足咁話：「有投訴個案即管轉介畀我，我每個禮拜六、日都喺寫字樓睇巿民嘅信。」真唔真㗎？年中無休好易捱壞噃。
好彩，林鄭轉個頭都話佢係一個成日發夢嘅人，仲認為唔發夢，發展就唔會行得快。佢咁講係回應民協嘅馮檢基話自己成日發夢，期望將來打工仔可以踩單車去中環返工，林鄭即刻和應，話單車系統聽落好似遙不可及，但發多啲夢都可能可以引進咁話喎。