政情：搞搞政：新金王睇好金價唔撐樓市

金價狂升，衝破一個又一個大關，有「新金王」稱號嘅全國政協委員黃英豪係上市公司金至尊主席，旗下公司揸住大把金，身家梗係水漲船高，問到佢對金價走勢嘅睇法，新金王心情靚靚，對金市前景仲好有信心，睇好金價會喺一千三百蚊美金一安士企得好硬淨。

黃英豪日前出席母校英國肯特（Kent）大學喺香港嘅活動時，講到幾種資產嘅前景，佢話，金價應該會繼續高企。至於股市，佢就睇唔到有大泡沫，因為股市資金主要以歐美為主，內地資金比重偏低，故此唔使太擔心。

不過，新金王明顯對樓市有啲擔心，仲認為樓市有泡沫，部分地區已出現咗過度投機嘅情況。政府近期雖然喺樓市推咗啲措施，但黃英豪認為，政府治本之道係推出多啲土地，市場供應多咗，炒家自然好難炒賣，置安心嘅一千單位要二○一四年至推出，遠水都救唔到近火啦！佢又話，香港仲有好多土地，好似長沙灣屠房都丟空咗廿年啦。