政情：區議員免費睇清明上河圖

電子動態版清明上河圖下個月嚟港展出，幾十萬張門票開售幾日就沽清，好多市民都望門興嘆，全港區議員就唔使憂，因為民政事務局決定，請區議員去觀賞。點解有此一舉？據講係為咗彌補區議員去唔到廣州亞運嘅遺憾喎。不過，睇真啲呢招都係慳水大法。

睇唔成亞運開幕補數

有區議員早前建議，組織個考察團去睇亞運開幕禮，等大家都開吓眼界又取經，建議去到民政事務局局長曾德成嗰度，即刻耍手擰頭，因為亞運開幕入場券勁貴，最靚位要六千八蚊一張飛，黃牛飛仲炒到兩萬幾。眼見睇唔成亞運開幕，德成局長就提議請全部區議員睇清明上河圖。

咁又係嘅，買五百幾張飛仲平過請一個議員去睇亞運，抵晒！

講番亞運，本港係咪申辦仲未有決定，早前話反對嘅立法會第一大黨民建聯，旗下西貢同東區區議員申請向黨豁免，以支持香港申亞，不過，建仔中委尋日反覆討論後都係維持原判，反對本港申亞，仲話任何黨員都不得輕易豁免。