政情：立會搬大屋 吳文華擴軍

政府同立法會成日都嗌精簡架構，實際卻往往反其道而行。明年九月，立法會就會搬去添馬艦政府總部嘅新大樓，俗語都有話上屋搬下屋，唔見一籮穀。今次立法會細屋搬大屋，當然一闊三大喇，如議員後年就由六十人增至七十人；立法會保安員亦要由三十人加到九十人，家吓佢哋更加請緊法律顧問、秘書甚至助理資訊科技主任等。編制大咗，秘書長吳文華（Pauline）管嘅嘢、揸嘅匙愈嚟愈多，真係大當家哦！

新聞頻道想放YouTube

Pauline尋日同秘書處高層與傳媒會面，講到出年九月就搬去面積大過家吓四倍嘅新大樓，佢哋計吓數都有好多發現，水、電、煤呢啲基本開支之外，大樓面積大咗好多，議會保安員數目已經要由家吓嘅卅個加碼到九十個，率先聘請嘅係總保安主任，今年十二月就會返工，到時呢位警司級人馬就會係保安嘅阿頭。

此外，助理秘書長分管嘅議會同小組工作大增，需要額外聘請九個人幫佢哋手。團隊壯大咗，立法會都有新搞作，Pauline佢哋構思緊，明年年初製作立法會新聞網，方便市民了解議會工作，仲諗緊喺YouTube整番條頻道，只係一年涉及六十萬元開支，需要立法會行政管理委員會通過。同時，立法會大會嘅電視直播，家吓由港台直播，第日就會改為立法會搵外判公司做，方便控制。

揀明年抖暑搬屋唔怕亂

不過，講嚟講去，呢啲大部分都係搬屋後嘅事，由於議會搬屋好少同類經驗，難怪有啲議員驚出現新機場搬屋嘅混亂，所以Pauline透露佢哋揀正九月搬，目的都係喺暑假休會時搬，到時仲要停開會兩周，避免出現混亂。當年立法會查政府搬機場搬出亂子，如果自己又衰咗真係好瘀㗎。