政情：林偉強坪洲敗選裸退倒數

前排都講過，身兼新界鄉議局副主席嘅坪洲鄉事委員會主席「We Wet強」林偉強嘅街坊代表支持者選情危危乎，情況果然不出所料。

鄉委會過去一直由挺強派嘅「黑衫軍」同倒強派嘅「黃衫軍」兩股勢力角力，自We Wet強本年初捲入區議會辦事處租金津貼風波後，黃衫軍誓要拉We Wet強落馬。據聞We Wet強為咗自救，瞓身拉票，前日仲帶埋阿媽返坪洲投票救亡，可惜十七個街坊代表之中，「黑衫軍」幾近全軍覆沒，只贏得兩個席位，當日下晝佢見大勢已去都提早鬆人。

選完街坊代表，We Wet強只得三票，就算明年一月選出嘅三個村代表都撐佢，一共只得六票亦難以連任鄉委會主席，繼而佢唔能夠以當然議員身份進身離島區議會，即係話佢連區議會主席個位都冇埋，意味佢將光脫脫裸退。

離島區議會主席由邊個補上？好多人話現任副主席「香姐」周轉香最有機會，但之前有傳話鄉議局主席劉皇發想捧女婿、離島委任區議員余漢坤上位。結局係點？有人話可能係香姐同余漢坤分別擔任正、副主席。