政情：搞搞政：潘潔請假惹縮骨疑雲

自從被嘲為「八國聯軍」嘅副局長上場後，每年喺十八區舉辦嘅施政報告地區論壇都由佢哋輪流出席，尋日屯門嗰場就係環境局副局長潘潔負責。不過，尋日一早我哋收到有屯門區議員報料，話佢縮沙唔出現，可能擔心居民反對起焚化爐，到時唔知點招架。

講到似層層喎！咁又難怪嘅，潘潔上任兩年有多，佢嘅表現有目共睹，再加上環境局喺年前建議喺屯門起焚化爐，已經畀區議會鬧爆，早前立法會又廢令，反對政府擴建將軍澳堆填區後，環境局局長邱騰華仲話會加快研究起焚化爐添，可以想像潘潔落到地區論壇，肯定變咗箭靶，畀地區人士鬧爆。

後來我哋打聽後發現，原來潘潔只係攞咗病假先至未能現身論壇，但由邊個頂替佢仲係未知數。再向屯門區議員收風，點知有好幾位連佢攞咗病假都唔知，佢哋追問政府搵邊個頂上亦不得要領，直至論壇開始前個零鐘頭，當局先至決定由環境局政治助理蔡少綿做代表。

連一場地區論壇都安排成咁，又點能令人信服呢？難怪潘潔病咗請假咁小事，都引嚟咁多疑雲啦！