政情：夏佳理遵母訓拒絕歧視
政情：夏佳理遵母訓拒絕歧視
強颱風鮎魚來勢洶洶，最終過門而不入，雖則打唔成風，但搞到本年度嘅勳銜頒授典禮被迫改期。獲頒大紫荊勳章嘅香港交易所主席兼行政會議成員阿Ron夏佳理尋日就話，上周六本來打算同太太、兩個囝囝去禮賓府見證佢光榮嘅一刻，依家典禮改期，點都有啲失望，事關專程返港觀禮嘅大仔，改期後未必可以出席。
阿Ron係印度同中國混血兒，尋日佢同班年輕人分享時，就直言佢媽媽喺佢細個時，已經教導佢唔好以「我係混血兒」作任何事嘅擋箭牌，仲話如果有人歧視佢，佢應該以理服人。佢又憶述自己留英讀書時，同一班非洲同學仔「溝埋一齊」，仲試過一齊上街，爭取種族平等添！
喺阿Ron擔任過咁多公職當中，佢話做馬會主席好有意義，佢記得喺○三年沙士之後，馬會捐錢五億元成立疾病預防及控制中心，成為咗今日嘅衞生防護中心嘅前身。
授勳典禮改期後，夏佳理話大仔未必可以出席到。