政情：鮎魚飄忽李本瀅無覺好瞓

上個禮拜強颱風鮎魚來勢洶洶但行蹤飄忽，李本瀅作為天文台台長，自不然無覺好瞓。台長尋日與傳媒聚頭，當大家講起鮎魚令全城戒備，點知過門不入兼冇料到時，佢強調天文台冇渲染鮎魚威力，只係颱風遇上季候風，預測有困難，天文台要每兩個鐘更新數據考慮掛唔掛波，佢都好大壓力。

禮拜三當各地氣象部門對鮎魚嘅方向有唔同意見，台長話佢嗰日只係瞓得一粒鐘，禮拜四都只係瞓得四粒鐘，三日加埋瞓唔夠五粒鐘，但今次都只係小考驗，唔算大挑戰喎！

佢又話鮎魚進入本港八百公里範圍都唔掛一號風球，只係考慮到天氣未轉差，一入八百米就掛波可能影響漁船作業，而且太早「晒波」令到一號風球要掛足一、兩日，會令巿民容易鬆懈。同時，佢又反駁天文台被人批評以經濟掛帥，多次強調天文台係睇數據同科學，以公眾安全「巿民一個都不能少」同社會影響為前提做決定。