政情：橄欖脫腳失副主席

早前講過隨時變成惹火議題嘅競爭法，外界盛傳建制派要攞晒相關草案委員會嘅正副主席職位，而喺建制派達成默契之下，仲決定由經濟動力梁君彥擔任主席添！

橄欖抽籤又輸運氣

競爭條例草案委員會有四十位議員，當中十五個喺泛民。專業會議梁美芬、五散人梁家騮、社民連黃毓民同埋公文袋梁家傑尋日都冇現身開會，換言之泛民主派只得十三票在手。選舉主席前，議員已經興風作浪，有泛民議員話要畀兩位候選人講嘢，但匯賢智庫葉劉淑儀就覺得草案委員會只係做法例工作，做主席嘅唔應該有強烈個人立場，故此冇必要。

擾攘一輪，卒之兩位候選人每人講分幾兩分鐘嘢，本身係香港貿易發展局理事嘅梁彥君，趁機澄清自己從冇講過反對競爭法。隨後梁君彥以二十一票大敗得十五票嘅泛民候選人，表面睇梁君彥好似無風無浪就做咗主席，但好明顯泛民攞到嘅票中，經已有兩票嚟自建制派陣營；之後選副主席時，建仔嘅「橄欖」陳鑑林同泛民竟然意外地打成平手，各自攞到十八票，即係總共有五票倒戈轉投泛民，橄欖最後喺抽籤定生死下輸埋運氣。

上咗岸嘅梁君彥當然唔理喇，但橄欖呢次行行下突然穿底墮橋，就掀起一場捉鬼遊戲，大家又知唔知邊個係鬼呢？

法案委員會人數雖多，但倒戈者有迹可尋。梁君彥人緣麻麻，唔見兩票不足為奇；反為喺議會中多仇家嘅橄欖，繼○六年選財務委員會一役，同白鴿黨劉慧卿打成平手兼又係輸抽籤，更加令人津津樂道。

工聯會否認做「鬼」

綜合各方消息，專業會議、五散人、「潮州怒漢」詹培忠、旅遊界議員謝偉俊，以及同橄欖有牙齒印已屬公開秘密嘅工聯會都有嫌疑。有建制派話，有人唔認同正副主席都由建制派包攬，所以咪倒戈囉！而工聯會議員黃國健就誓神劈願話，工聯會同建仔分屬兄弟，佢哋又同橄欖係老友，從來都互相支持，倒戈者一定唔係佢哋。邊個係人係鬼？睇嚟只有佢哋自己先知啦！