政情：搞搞政：莎姐重出江湖涉黨務

富貴黨喺○八年立法會選舉受挫，觸發田北俊同「莎姐」周梁淑怡辭去正、副主席職務，黨務大權交棒畀正、副主席劉健儀（Miriam）、張宇人同方剛，同埋中常委田北辰。莎姐對政壇一啲都冇戀棧，有時間就同老公遊埠，不知幾優游。直到今年三月，最低工資掀起「廿蚊張」風波後，令富貴黨捲入政治漩渦，據悉，當時Miriam四人馬上搵嚟田少同莎姐商議對策，開過多次會議，一步步走出低谷，而變相掌握黨內一切重大決策大權嘅G6亦由此成形。

唔講唔知，莎姐由上禮拜起列席逢禮拜一由田二少同地區骨幹進行「腦震盪」嘅一般事務關注組會議，就係佢重出江湖再涉黨務嘅具體行動。

關注組嘅成立，一嚟培育新人，二嚟度橋省招牌。據聞，富貴黨批評畀施政報告「置安心」抄橋嘅「租積金」房屋政策建議，就係關注組腦震盪「震」出嚟嘅。關注組有莎姐做補習老師，度出嚟嘅橋就會更成熟啱用。

再加上黨內三名立法會議員都嚟自功能界別，對黨嘅定向難免偏向功能界別，但直選至係政黨嘅長遠目標，而田二少嘅立場都傾向於直選，田少同莎姐都經過直選洗禮，佢哋介入多咗之後，G6就成為三票直選對三票功能界別，黨嘅立場就唔使偏埋一邊，起到平衡作用。