政情：李文俊掃豪宅睇好樓市

五百年一遇嘅強颱風鮎魚已經喺福建登陸，香港未受太大影響，尋日天色風和日麗，沙田馬場更係人頭湧湧。呢排樓市炒到㷫合合，係咪已經見頂呢？名人各有妙論。

理文造紙行政總裁兼執行董事李文俊嘅愛駒「包裝選擇」跑第三，獲九萬多元獎金。佢呢排喜事重重，半年前第三度添丁，又購入何文田灝畋峰，擺明睇好後市，佢仲笑言唔記得層樓買咗幾多錢。翻查資料，原來佢購入相連戶，作價一億二千萬元。近月樓市爆升，佢層樓應該水漲船高，但佢話個物業係買嚟自住，以便佢喺觀塘返工，冇理會升幾多喎。

不過，同場嘅著名廠商南太電子創辦人顧明均就冇咁樂觀，佢自爆喺香港冇樓揸手，又話：「莫講話依家，就算早五年、十年前，我都覺得香港啲樓唔抵買。」

正所謂世事難料，好似立法會飲食界代表「肥仔張」張宇人咁，愛駒「越跑越有」喺主人缺席情況下爆冷勝出，贏得逾三十六萬獎金。代父上陣拉頭馬嘅肥仔張囝囝Chris張士宗話細妹十月十號喺香港註冊結婚，近日同爸爸返美國大宴親朋。