政情：劉秀成撐陳智思選特首

依家已出現幾個疑似特首候選人，仲不時隔空鬥法。立法會建築、測量及都市規劃界議員劉秀成喺尋日播出嘅電台節目講加入立法會從政嘅經過時，話覺得立會舊同事陳智思好叻，好應該去選特首。

原來劉教授識睇風水，已故港督尤德亦曾徵詢佢意見，佢話依家禮賓府其實好多係日式設計，唔明當年點解唔改番做英式喎。劉教授曾經做過港大建築系系主任，之後轉戰建築師學會做會長，期間睇到好多社會問題，令佢萌生從政嘅念頭。佢話自己桃李滿門，能夠當選議員都可能因為咁。

佢亦透露，當年初入立法會乜都唔識，幸好得工程界何鍾泰指點，加上當時泛聯盟嘅朋友幫手，先可以咁快上手。佢仲特別提到，立法會前保險界議員陳智思年輕、有幹勁又夠叻，真係好應該選特首，但對方成日話自己身體唔好，所以唔想做。其實「公職王」陳智思依家咁多公職，身體仍然咁好，唔知佢聽到劉教授咁講會唔會心動呢？