政情：袁彌明偶像係戴卓爾夫人
政情：袁彌明偶像係戴卓爾夫人
早前高調成立嘅選民力量，勢要搞垮泛民協調機制，要喺政改方案轉軚嘅白鴿黨喺明年區選「票債票償」。成員之一嘅Erica袁彌明尋日首次落區呼籲市民登記做選民，一向對政治有興趣嘅佢話喺本港搵唔到值得佢欣賞嘅政治偶像，仲自爆自小就封英國前首相戴卓爾夫人同美國前總統列根做偶像。
Erica解釋，戴卓爾夫人同列根都非常堅持自己嘅理念，工作能力亦相當出色，即使施政時遇上重重阻力，都能一一克服，而歷史亦證實佢哋做法正確，令人欽佩。
加入選民力量已經一段日子嘅Erica笑言，雖然自己只係組織嘅庶務主任，但角色舉足輕重，事關印傳單、整易拉架同網頁，以至聯絡各方人物嘅重責都落喺佢身上。佢又話組織內唔少成員都有正職，反而自己工作就較有彈性，啱晒做呢啲工夫喎！
袁彌明尋日首次落區，呼籲市民登記做選民。
