政情：私隱鬥士火併阿涂

八達通出賣顧客個人資料圖利醜聞令全城嘩然，政府事後急急補鑊，依家正就修訂《個人資料私隱條例》諮詢公眾。仲記得八達通醜聞曝光後，各個黨派紛紛出嚟抽水，工聯會「阿王」王國興成功跑出，變咗「私隱鬥士」，但當日信誓旦旦話會用尚方寶劍《立法會(權力及特權)條例》去徹查呢件事，後來因為得到港鐵行政總裁周松崗承諾改善，同時採取幾項改變措施，佢最終撤回呢個要求。

冇出尚方寶劍

阿王冇提出用尚方寶劍查八達通，白鴿黨嘅涂謹申日前喺立法會內會要求委任專責委員會調查商業機構轉移客戶個人資料，但最終因為得唔到在場議員支持，最終要撤回呢個建議。

「城市論壇」尋日討論八達通事件同私隱條例，阿涂批評立法會冇將八達通事件查到底；誰知阿王隨即反駁，話立法會已經逼到港鐵承擔責任，同埋唔會就私隱專員公署嘅報告提出司法覆核，加上兩位坐喺港鐵董事局嘅局長已經畀立法會嚴厲批評，所以並唔係做唔到嘢，反指阿涂日前喺內會收番自己個建議，唔明佢乜嘢意思。

之前喺立法會辯論改善個人資料私隱保障議案同內會兩次狙擊阿王嘅阿涂，聽到對頭人咁講，條氣梗唔順啦，即時話工聯會冇出席內會，認為佢哋講就無敵、做就腳軟，佢就從來冇相信過工聯會會做到底嘞。

論壇場面混亂

說罷，阿王即時呲牙咧嘴、疾言厲色，澄清工聯會當日有出席內會，仲話阿涂咁講係抹黑，腳軟嘅係阿涂先啱。雙方互翻舊帳兼抽後腿，你一言我一語，場面極為混亂，主持人謝志峰被迫打圓場，人權監察總幹事羅沃啟亦幫手轉移視線，佢兩個先肯收口咋。

阿涂三度插阿王，唔通真係同做唔成「私隱鬥士」有關？雖然論壇鬧劇落幕，但好戲在後頭，「維園阿哥」任亮憲發言時不忘揶揄佢兩位，話城市論壇愈嚟愈精彩，因為上演咗一幕保皇黨鬼打鬼、爭相邀功嘅場面。畀維園阿哥咁窒法，唔知阿王同阿涂點諗呢？