政情：林健鋒拉隊撐隱世廚神

食肆嘅生招牌往往係大廚，中環九如坊蘭桂坊酒店一樓嘅中菜館「名人坊」（Celebrity Cuisine），開業三年嚟，名人食客如雲，大多都係慕名一嘗「隱世廚神」鄭錦富（富哥）嘅拿手名菜，立法會議員林健鋒（Jeffrey）都被佢所迷，最鍾情蒸焗魚雲同鮮蝦餃。

Jeffrey早前同香港總商會一班核心成員拉大隊去幫襯富哥，特別訂定六條每條重逾六斤嘅新鮮淡水魚，目的只為每人享用半個蒸焗大魚嘴。富哥嘅蒸焗魚雲選用大條新鮮淡水魚，先將魚雲蒸香後再焗，手法特別。至於鮮蝦餃，Jeffrey就大讚大大粒兼皮薄餡靚，每隻蝦餃有六隻新鮮大海蝦，食落鮮味爽口。富哥另一味蒸焗魚腸，整法係先用薑葱水滾走肥油，再加入其他食材放入缽仔蒸焗，唔油膩之餘又可以辟走魚腸腥味，當然受歡迎。

富哥係廣東寶安人，七三年入行，曾喺銅鑼灣紅寶石酒樓同筲箕灣洞天酒樓學師，七五年去遠東交易所會所做二廚，期間認識好多名人，後獲富商重金禮聘做私人大廚二十年。難怪名人坊嘅留名冊有好多尊貴食客，例如恒基地產主席李兆基同新抱徐子淇、利豐集團主席馮國經、新鴻基地產副主席郭炳聯、富士攝影器材主席孫大倫，及華懋集團管治委員會主席龔仁心夫婦等。