政情：毓民孫仔同樣牙尖嘴利
政情：毓民孫仔同樣牙尖嘴利
政壇好多阿爺輩，講起孫仔孫女就心都甜晒。上個禮拜三，立法會開大會，好多議員都夾住大疊公文返去開會，社民連嘅黃毓民就加多一抽二袋，以為佢買定生果、帶定道具準備返去掟啦，睇真啲，原來係朱古力，用嚟掟果然有新意噃！
不過，毓民話月尾就係萬聖節，佢只係買定盒朱古力畀個孫仔食吓、開心吓啫。可惜佢呢排好忙，唔得閒直接交畀個孫，所以嗰日開會都要拎返立法會，交畀秘書代為轉交孫仔。
講起個甜心，毓民透露銀包有孫仔嘅得意相，一臉祥和嘅阿爺仲話，個孫依家雖然得三歲人仔，但同佢一樣牙尖嘴利。毓民又話，要勤啲帶個孫返教會跟上帝。
毓民一抽二袋返立法會，原來買咗盒朱古力畀孫仔過萬聖節。