政情：搞搞政：陳維安借老友教路北上

北上發展已成大潮流，教育局副局長陳維安（Kenneth）尋日出席一個青年團體嘅活動時，直言在座嘅三分之一或一半青年將來會去內地發展，仲話：「年輕人點都要去內地闖一闖！」喺佢眼中，香港人既了解中華文化，又了解西方文化，正係優勢所在。

佢尋日講到北上開荒時，自爆老友嘅發展，原來深受股民喜愛嘅中國平安保險總經理張子欣係佢二十年嘅老友，兩人喺九十年代仲一度做過同事添。早喺九三年，Kenneth同張子欣一齊喺一間管理顧問公司工作，為一啲國際企業提供進軍內地嘅資訊。九三、九四年，平保崛起，主要做一啲生仔生女嘅保險，或者火箭發生意外嘅保險，屬於一間願意冒險嘅保險公司，張子欣見內地有市場，對個人嚟講係一個好好發展嘅機會，於是毅然加入平保。

就係咁，老友喺內地發展順風順水，Kenneth就輾轉做過唔同機構。雖然Kenneth冇講自己留港發展嘅選擇，但佢預測五、六十名在座青少年或有一半人要去內地發展，都算係一個大比例，唔通未來嘅財路一定要向北看？