政情：梁卓偉冧女士力場強勁
政情：梁卓偉冧女士力場強勁
颱風鮎魚來襲，一度引起全港戒備，最終過門不入，天氣戲劇性好轉。食物及衞生局副局長梁卓偉尋日出席個活動時，都攞天氣嚟講笑，仲趁機向一眾婦女狂笠高帽，話天氣咁好，係因為婦女嘅強勁「力場」喎！咁都得？
梁卓偉尋日出席婦女動力協會舉辦嘅婦女精神健康大使計劃，佢話收到婦女動力協會副主席麥美娟來電邀請後，隨即答允出席活動，原本都擔心呢個活動會因為風暴取消，點知尋日天氣咁好，仲賣晒口乖，結果梗係冧到在場婦女拍爛手掌啦。
同佢出席同一活動嘅勞工及福利局政治助理莫宜端，就借傳媒朋友患上精神病嘅經歷嚟推銷當局嘅精神健康政策。佢透露，以前做傳媒時，識得個行家好朋友患上精神病，好彩喺家人同朋友嘅不斷支持下，終於喺幾年後康復重投工作崗位，所以佢認為面對精神健康出問題嘅人，除咗治療外，家人同朋友嘅支持都係強心針。
梁卓偉話一眾婦女嘅「力場」令天氣風和日麗。