政情：劉秀成怪醫做雷曼逃兵

立法會調查雷曼事件嘅小組尋日開會，今次係第四次、亦應該係最後一次傳召出售雷曼產品最多嘅中銀香港高層作供嘅會議。會前一個禮拜，小組成員專業會議嘅劉秀成，同五散人「怪醫」梁家騮卻向秘書處申請退出。佢哋出逃加埋原本嘅退出者，令到呢個原本有二十七人嘅小組唔見咗三分一人。雷曼調查小組曾經係立法會各黨派布重兵嘅戰場，家吓卻變成有頭威、冇尾陣，難怪銀行界怨聲載道，市民亦愈睇愈眼冤啦！

撰寫報告日子漸近

我哋早前都講過，雷曼調查小組經過兩年運作後，好多議員嘅熱情已過，除咗有人做逃兵外，開會遲到、早退嚴重，部分成員出席會議嘅比率仲好低添。最弊嘅係，家吓距離小組撰寫報告嘅日子漸近，成員相繼減少，對調查工作有負面影響。

尋日嘅聆訊喺朝早九點半開始，小組一早話明可能由朝玩到晚，希望結束對中銀嘅聆訊。議事廳內外尋日一片靜英英，議員唔多，採訪者更少。立法會秘書處嘅資料顯示，今年暑假以嚟，先有白鴿黨副主席劉慧卿喺八月二十三號要求退出小組；復會之後，劉秀成又喺十月十四號提出退出要求；二十一號，即係今次聆訊前兩日，怪醫亦忽然告別，尋日嘅馬拉松聆訊已經唔使參加。走吓走吓，個小組總共冇咗九個人。

成立之時群情洶湧

劉秀成話復會後，佢要做發展小組主席，又肩負海濱事宜等規劃工作，實在兼顧唔到。怪醫嘅離開，唔知同佢離開醫管局搵真銀有冇關係呢？回想兩年前雷曼小組成立時，立法會議員群情洶湧，有近三十人舉手，最後組成二十七人嘅調查小組，點知兩年落嚟，雷曼小組嘅調查工作愈嚟愈雞肋，議員亦買少見少，乜嘢叫虎頭蛇尾，呢次真係真人騷！