政情：搞搞政：是非人物避席立會飯局

近期政壇是非多，一邊有新界王劉皇發嘅「漏報事件」餘波未了，一邊有申亞搞到最大建制派都睇唔過眼，仲有疑似特首嘅競逐遊戲。尋日立法會宴請高官，呢個飯局本來係一年一度行政立法機構嘅重頭戲，點知尋日一干是非人物、焦點人物全部隱形。

主人家發叔冇影

發叔身兼行政及立法兩會成員，尋日嘅場合，佢既係主人家，又係客人，應該滿場飛至係，但佢就冇現身。被指疑似特首候選人嘅行會召集人梁振英，同埋畀民政事務局局長曾德成喺十八區正、副主席面前力數阻住政府申亞嘅建仔主席譚耀宗亦一律缺席。

申亞搞到頭都大嘅德成局長，飯局之後成為記者包圍對象，本來大家想問吓佢有冇計劃說服建仔回心轉意，改撐政府申亞，但德成局長一於封嘴，有記者講笑咁話唔畀佢走，德成局長竟然好認真咁反問：「你點唔畀我走呢？」跟住就走咗去。至於被指阻住晒嘅譚Sir都冇去食飯，到底係唔想同德成局長一齊現身吖，定係費事畀人問到口啞啞呢？相信只有佢自己至知。