政情：鮎魚累政協人大活動取消
政情：鮎魚累政協人大活動取消
鮎魚挾住超強颱風嘅威勢來襲，嚇到好多團體都提早應變，香港友好協進會主辦嘅一年一度港區全國政協及人大活動日，原定今、明兩日舉行，亦因為颱風取消咗。人大政協個個都係大忙人，重搞要再夾時間，難度都好高吓。
呢項活動原定今、明兩日喺霍英東家族旗下嘅廣州南沙高爾夫球會舉行，與會者較量吓球技之餘順便聯誼，據聞今年高球賽參加者依然踴躍，除會長陳永棋打頭陣，仲有福建幫頭領盧文端以及林健鋒、梁君彥等協會核心，中總永遠榮譽會長霍震寰則以球會主人家身份出席，因為今次活動由霍家贊助。
今年協進會請嚟全國政協副主席鄭萬通主禮，其他嘉賓就有中央統戰部副部長尤蘭田、中聯辦副主任黎桂康、周俊明同黃蘭發，仲有全國僑聯副主席王永樂等。至於去年有參賽嘅中聯辦主任彭清華，據聞因依家身在中央黨校進修，未能抽空出席。