政情：高達扮蝙蝠俠反似企鵝

白鴿黨立法會議員李永達、涂謹申尋日玩變身，以一身蝙蝠俠同羅賓嘅造型現身立法會，以為佢哋提早慶祝萬聖節啦，點知佢哋兩個係為聽日舉行嘅第五屆「鼠戰中環」慈善賽跑預演。不過，漫畫同電影中嘅蝙蝠俠高大威猛，但高達嘅扮相就有啲牽強，仲畀黨友寸佢似扮緊奸角企鵝多啲！

「鼠戰中環」係一個推廣中港兩地精神健康嘅籌款活動，參加者可以扮鬼扮馬參賽。阿涂早前忽發奇想，諗出扮蝙蝠俠同羅賓，因為佢覺得自己同高達都係「正義嘅朋友」喎！不過，做正義嘅朋友都有代價㗎，套衫使咗佢成千蚊！

高達嘅蝙蝠俠造型好趣怪，衫上嗰六舊腹肌喺佢心口位，搞到佢成個人唔成比例，佢仲猛話件衫好焗，焗到佢滿頭大汗。路過嘅黃成智掩住半邊嘴笑高達似企鵝多啲，搞到身為蝙蝠俠拍檔嘅羅賓阿涂捧腹大笑。

佢哋兩人一度打算着住套衫入議事廳開內務委員會會議，最後都係頂唔順除番落嚟，否則可能係蝙蝠俠同羅賓首趟去立法會開會。