政情：IQ博士自嘲唔夠老婆出名
政情：IQ博士自嘲唔夠老婆出名
全國政協常委會尋日通過今屆政協委員嘅增補名單，總共增補咗二十三人，港區有三個，包括立法會議員黃宜弘（IQ博士）太太梁鳳儀、沙田區議員簡松年同九龍城委任區議員王惠貞。內地增補委員方面，則有前國務院總理朱鎔基女兒朱燕來、原國務院國資委主任李榮融、貴州省省長林樹森、中國佛教協會會長傳印長老同銀泰百貨集團董事長沈國軍等。
梁鳳儀榮升政協，連老公IQ博士都好開心，尋日不惜自貶：「依家太太知名度高過我，社會地位高過我，你話我會有乜感受吖？」不過，講到太太業務纏身，依家仲多項公職，IQ博士話希望太太妥善分配時間，唔好太疲累。
本身係全國政協委員嘅前中大校長劉遵義，獲增補為政協人口資源環境委員會副主任，地位等同全國政協常委，加上佢近日獲委任為中投國際（香港）主席，睇嚟好受中央重視噃。
IQ博士希望工作繁重嘅太太可妥善分配時間。 資料圖片