政情：九西兩女將密密賣樓

香港人鍾意炒樓，「新界王」劉皇發早前被踢爆漏報賣樓利益風波，對好多公職人員都有警惕作用，九龍西立法會女議員李慧琼同梁美芬喺「漏報事件」後一個禮拜，急急向立法會秘書處申報，除補飛味道濃郁，仲可以睇到兩人都係樓市玩家。前者趁樓市火熱，自去年五月至今出售咗兩個單位，但仲有兩個單位揸手；後者自去年一月至今年三月進行過三宗物業交易，依家仲有五層樓揸手。

佢哋兩個身家豐厚程度雖然追唔到發叔，但喺樓價一飛沖天嘅時刻密密手交易，進帳梗係豐厚啦。梁美芬○八年進身立會時申報有六個物業，上個月二十八號，佢即刻申報舊年一月至今年三月做過三項物業買賣，申報顯示舊年三月佢曾經買入九龍西一個物業，同月再賣出同一棟大廈另一個物業。梁美芬解釋，喺同一大廈買番間質素高嘅單位，只係樓換樓，有利長線收租投資，仲話自己喺低位放樓，當交學費喎。

建仔李慧琼嘅申報顯示，○九年十月佢同丈夫喺香港島同九龍區共同擁有四個物業，今年五月賣咗一個；本月三號，又再賣一間。點解半年內賣兩層樓？佢話基於私人理由，不便透露。

袋巾傑持有13個物業

議會另一個大業主係公文袋嘅袋巾傑，佢本來有十二間用嚟持有物業嘅公司，本月十三號，佢再更新個人申報，多咗一間同類型公司，即係持有物業達十三個之多。佢話除自住用途嗰間之外，全部物業位於外地。原來好多立法會議員都勁有米！