政情：投資表現遠遜星洲攞命陳一味兜

近排股市大旺，投資場上不停傳嚟好消息，新加坡主權基金早前公布今年上半年嘅投資成績彪炳。金管局總裁陳德霖（攞命陳）尋日出席一個午餐會時，就被港區全國政協劉夢熊當面問到，點解新加坡嘅基金上半年可以賺四成二，但香港嘅外匯基金就要見紅？

劉夢熊出拳犀利，攞命陳就嚟一招「有橋就有賞」，話場內人士邊個可以令外匯基金回報大升而風險又唔增加嘅，金管局重重有賞。嘩，金管局有咁多高薪投資專家仲要懸紅攞橋？

盈轉虧蝕14億元醜怪

金管局投資收益偏低一向為人詬病，立法會過去都批評過好多次，攞命陳尋日出席午餐會時，就被劉夢熊問到香港同新加坡素有「雙城」之稱，但新加坡主權基金今年上半年總回報率高達百分之四十二，香港嘅外匯基金上半年投資卻由盈轉虧，見紅虧蝕咗十四億元，點解有咁大差距？

攞命陳好似有備而嚟，話外匯基金唔係一般主權基金，成立目的為穩定發鈔市場，投資要穩健，唔係單純追求回報。佢仲向在座人士話，邊個可令外匯基金回報大升而風險又唔增加嘅，金管局重重有賞；又叫大家睇番新加坡主權基金○九年三月嘅年報，指基金之前「表現一樣好驚人，不過，係另一面」，即係話主權基金風險大，以前曾經蝕得好勁。

彈老調懶理市民建議

攞命陳嘅意思係金管局投資要平穩，賺嘅雖然唔多，蝕嘅亦一定唔多。不過，好多港人都認為，市面有啲退休基金一樣好穩陣，投資收益都高過外匯基金啦；亦有建議要政府喺外匯基金裏面攞一舊錢出嚟另行投資，但金管局一概懶理。一年將過，立法會揸住金管局成績表追打嘅日子亦不遠，攞命陳如果又係老調重彈，睇怕有排捱轟。