瞌一瞌差啲冇咗條命

【本報訊】經歷生死一線的兩名的士司機黃家富及羅耀明，在逃出生天後仍全身打顫，滿面驚惶，頻呼好驚及好彩，但將有一段日子「瞓唔着」。赤腳逃出的富哥表示要還神，但昨晚他因精神受困擾，前往醫院求醫，須留院觀察。而明哥在慶幸自己安然無恙之餘，因曾與被困旅遊巴司機四目交投，以為他瀕臨死亡，又無力拯救，心感不安。

富哥憶述：「當時現場有二百部的士，我挨低司機位，除咗對鞋，瞓覺休息，停咗三個字（十五分鐘），突然間聽到啪啦啪啦嘅撞擊聲，即刻扎醒。」然後「一望左邊就見有嘢壓咗落嚟我㗎車嘞，嘩！當時驚到我都唔知點，拿拿聲嘗試開唔開到門走，好彩司機位道門冇壓住，開得到，我拿拿聲爬出嚟。」他坦言：「當時連鞋都冇着，乜嘢都冇拎……驚呀，當時好驚，啱啱右邊司機位冇事，好彩好彩，要還神嘞，好彩，真係死過翻生。」事後他即時向家人報平安。

與被困旅巴司機四目交投

至於作為的士車主的明哥，意外發生時聽到砰一聲：「見到泵把類似啲黑色嘢飛落嚟，跟住嗰㗎旅遊巴就喺你前面嘞，我就第一時間落咗車！」當時旅遊巴壓着他的士的車頭，而旅遊巴車頭正對着的士車頭，羅目睹旅遊巴司機被困情況。他嘆謂：「咁個司機就伏咗喺軚盤度囉……大家望住大家㗎……佢有反應，但係冇嗌，佢仲有呼吸。」

對於有心無力拯救，明哥的心情非常不安。不過，當他由警方獲知旅巴司機只受重傷，頓然釋懷。