政情：陳維安解畫背書做箭靶
政情：陳維安解畫背書做箭靶
呢排班局長輪流去立法會就施政報告解畫，尋日原本輪到教育局局長孫明揚去立法會教育事務委員會解釋施政報告嘅教育措施，但因為佢身體抱恙臨時甩底，要由副局長陳維安以署理局長身份頂上，點知就累到陳維安做咗箭靶，畀班議員輪流炮轟。
可能連陳維安都諗住今年教育方面冇乜嘢特別政策，實好易過骨，點知班議員咬住新增嘅國民教育課程唔放，張文光、李卓人等輪流發炮，話完個政策事前冇諮詢，又話原本嘅公民教育變成國民教育，公民教育係咪唔使理，兼且擔心要學生考試嘅國民教育同基本法課程，只係想幫學生洗腦，相反一啲敏感議題就唔會講。
雖然陳維安都逐一解答問題，但愈答就愈似背書，答晒啲官方答案，嚟嚟去去都係嗰幾句，搞到班議員好唔順氣，火都嚟埋，仲鬧佢答非所問講嘢一舊舊。
陳維安尋日做咗孫公嘅替身，去立法會做箭靶。 資料圖片
