政情：公社轉軚求生 撐政制發展立法

泛民主派喺「五區公投」後步向分裂，社民連更加同支持政改方案嘅白鴿黨誓不兩立，仲話要用盡一切機會狙擊白鴿黨，等啲選民記住白鴿黨喺政改方案轉軚，但可能有政黨突然覺得自己行錯路，三個政黨依家有復合可能。真係？

支持度下滑急補鑊

一直係「夾心人」、支持政改但又冇退黨嘅公文袋議員湯家驊，會喺下禮拜施政報告致謝動議上提出修訂，要求政府就本港政制發展一次過立法，現階段公社兩黨已經表示支持，表面上看似立場一致。

修訂致謝動議係喺公文袋嘅同意下提出，湯家驊話其實佢對公文袋嘅新諗法都覺得好錯愕，因為一直以嚟，公社兩黨都冇認同過談判，所以從來都冇諗過兩黨會支持一次過立法。

到底點解兩黨態度有變呢？公社兩黨一意孤行策動變相「公投」，搞到立法會要進行五區補選，勞民傷財，經過政改方案一役後，支持度大幅下滑，相信公文袋都有必要重新檢視自己嘅路線，如果唔係就必定死路一條，因為民調都反映市民大都支持談判。公社兩黨呢次u-turn，要求政府就本港政制發展一次過立法，係咪又轉軚呢？