政情：蔡關穎琴撐李垂誼開騷

眾所周知，中華總商會會長蔡冠深全家都係音樂發燒友，多次喺山頂大屋舉行音樂會，邀請過百名賓客欣賞鋼琴家郎朗、世界著名大提琴家Trey李垂誼等名家嘅演奏。蔡太蔡關穎琴最近更加喺老公支持下，成立咗垂誼樂社並親任主席，Trey出任藝術總監，兩夫婦愛才之情唔使多講。

蔡太尋日現身推介樂社嘅頭炮音樂會，下禮拜二Trey將同慕尼黑室樂團合作演出，並為香港演藝學院籌款。問蔡太點解對音樂咁癡迷，原來佢六歲開始學鋼琴，後來學埋唱歌，鋼琴同聲樂都考到八級資格，佢結婚前掹咗蔡冠深學唱歌，雖然老公事業繁忙未能持之以恒，但老師啟蒙咗佢唱高音嘅天分，佢笑稱：「佢唱到嘅高音仲高過我！」老公有時喺屋企食完晚飯後，會一時興起引吭高歌，佢就彈琴助興，場面不知幾溫馨。

尋日Trey攜帶Pressenda大提琴出席，把琴係從台灣奇美博物館借出，為期一年。Trey話，奇美嘅收藏全球知名，又不吝嗇免費借出，佢次次搭飛機都要幫個琴買多張窗口位機票，仲要全程攬實添！