政情：Eva硬做地產代理生招牌

呢排熱爆全城嘅話題係「上車難」，經濟動力尋日就搞咗個上車置業動力展，除搵咗三間物業代理公司參展介紹上車盤外，仲邀請到運輸及房屋局局長Eva鄭汝樺撐場添。

原本Eva諗住行個圈就走，點知其中一間參展物業代理美聯集團嘅太子女黃靜怡同高級執行董事黃錦康突然殺到，黃靜怡同Eva講，佢爸爸即係老闆黃建業有事嚟唔到。Eva反應冷淡，冇乜回應之餘，對眼仲繼續望住展板。

當Eva準備離開，美聯有職員即時邀請佢同兩位公司高層合照，Eva起初好抗拒，好老實咁話同另外兩間地產代理都冇影相，所以唔想合照。不過，盛情難卻，佢最終都同咗兩位美聯高層合照，但為咗唔想畀人覺得偏心，佢專登走去同另外兩間代理嘅職員合照，可惜佢全程冇乜表情，擺明唔太開心，唔知係咪驚畀啲地產代理將佢嘅玉照貼喺地產舖門口，唔覺意做咗地產舖嘅生招牌呢？

講番個展覽，主人家之一嘅梁君彥一早到場，林健鋒同梁劉柔芬兩位主人家竟然仲遲過局長到。梁君彥話一直住喺屋企物業，所以冇置業煩惱，但佢提醒市民買樓一定要量力而為，買樓前一定要計清楚自己嘅負擔能力，唔好上錯車。