政情：德成局長鬼祟插譚Sir

政府建議豪花逾四百億元申辦二○二三年亞運，惹嚟市民同政黨幾乎一面倒反對，狠批浪費公帑，就連曾經喺立法會動議要求政府申亞嘅建仔都轉軚反對。

據聞，民政事務局局長曾德成尋日同十八區區議會正副主席會面時，講講吓近期申亞嘅地區諮詢工作時突然發難，點名直斥建仔譚耀宗急就章表態反對申亞，搞到政府冇彎轉。德成局長都鬧得夠鬼祟嘞，又唔見佢公開咁鬧譚Sir？

佢之所以講得咁口響，皆因佢知道好多建仔嘅區議員表明會用個人名義力撐政府申亞，仲批評譚Sir急就章表態做法戇居。當中有個講法，指上月二十八號建仔中委會之所以一致通過反對申亞，主要係有較年輕嘅區議員擔心逆民意會影響明年區議會換屆選情，加上當局即將落地區諮詢，所以逼譚Sir盡早表態。

有知情人士透露，其實係啲較年輕又實力不足嘅區議員摸唔清政治形勢，見民意勢色唔對就騰晒雞。佢仲認為就算當日中委會上聽到強烈嘅反對聲音，譚Sir都未必要大家立即表決，造成得出反對申亞嘅立場，況且當日唔少黨高層身在北京，起碼聽埋其他黨員意見先表態都未遲。上述版本係真係假都唔知，分分鐘建仔同德成局長扯貓尾補鑊都未定。