政情：阿Paul大報復帳委會攝位

尋日同大家講過，公文袋嘅袋巾傑同社民連嘅黃毓民玩變相「公投」玩出火，辭職參與補選重返立法會後，又想食回頭草重入立法會政府帳目委員會（英文簡寫為PAC），點知如意算盤打唔響，喺建制派唔肯再支持佢哋下，泛民隨時賠了夫人又折兵，究竟會點收科呢？

建仔撐建制派出選

喺泛民同建制派嘅協調機制下，PAC七位成員一向都分別由四位建制派、三位泛民嘅比例組成，負責協調嘅建制派議員早前講明建仔唔派人出嚟爭，但若果建制派有其他人出嚟選，建仔就會支持。

坊間一直盛傳有建制派議員想阻止袋巾傑同毓民入番PAC，最新消息係，由法律超人變咗旅遊超人嘅阿Paul謝偉俊對PAC席位虎視眈眈，再加上佢同毓民過去有咁多過節，難免令人聯想佢係做攔路虎阻毓民入番PAC。

袋巾傑同毓民喺PAC嘅席位，依家由另外兩個泛民議員做替工，呢兩個替工原本打算喺今日內務委員會會議上辭職，之後將PAC席位自動過戶畀番袋巾傑同毓民，但因為建制派唔肯再支持，若果又有建制派嘅議員出嚟爭，咁兩個替工辭職後，泛民分分鐘連位都冇埋，搞到泛民企晒喺度，唔上唔落，都唔知點做先啱。依家傳出阿Paul會出嚟爭，今日內務委員會肯定有嘢睇。

泛民或留低兩替工

阿Paul尋日冇正面回應選唔選PAC，但佢話自從袋巾傑同毓民兩個辭職之後，協調機制已經破壞咗，乜嘢都要推倒重來。佢今個年度已經入咗六個委員會，工作已經好繁重，依家未考慮爭唔爭PAC個位。

咦！阿Paul留晒後路畀自己喎！正所謂敵不動，我不動，梗係睇定形勢先啦，若果泛民兩個替工今日辭職，阿Paul成功進入PAC嘅機會好高，咁袋巾傑同毓民兩個只能留一個，到時佢哋可能又要打餐死；但若果泛民封盤，兩個替工都留低，咁阿Paul想擘都擘唔開PAC度門，咁又何必講得咁早同講得咁死呢？