烽火台：道歉不等如認錯

由於私隱專員蔣任宏爆出一句石破天驚的「違例不等如犯罪」，通識課堂七嘴八舌，議論紛紛：老師老師，遲到不等如犯校規，以後咪再罰我留堂……老師老師，出貓不等如作弊，下次請你手下留情……我聽人講，索K不等如吸毒……通敵不等如叛國……受賄不等如貪污……放火不等如刑毀，放火可能為咗殺人，不過咁，香港法例禁止殺人，而違例不等如犯罪，換言之，殺人亦不等如犯罪，嘻嘻……

眼見通識課教不下去，新紮教師靈機一觸，轉教中文：同學仔，有冇聽過「竊鈎者誅，竊國者侯」呢？因為八達通出賣私隱危害二百幾萬人，獲利五千幾萬，已經達到「竊國」級數，再加上佢哋有官方後台，藤瓜，瓜藤，背後個個都係「竊國級」嘅人物，所以咪無事咯。呢個故事教訓我哋，偷雞摸狗冇運行，要做就做竊國者。

但見老師話鋒一轉：雖然「違例不等如犯罪」九唔搭八，但「道歉不等如認錯」卻是有根有據。君不見八達通賣料事件招惹滿城風雨，個個高層輪流出嚟道歉。之不過，呢頭道完歉，嗰頭有市民以「感情傷害」入稟小額錢債審裁處，索償區區五十元，八達通就露出一副財大氣粗嘅嘴臉，堅拒賠償，要求將案件轉至較高法院審理，用昂貴律師費同堂費拖垮入稟嘅小市民。八達通連賠款謝罪都唔肯，你話係咪道歉唔認錯呢？

同學仔，老師再教你一句古文──有惡不懲，小人必猖。私隱專員話八達通唔會再犯，你信唔信？