政情：阿王掛假腳為傷健發聲

數數吓，立法會尋日係第九次辯論正視殘疾人士交通需要嘅議案，雖然每次都獲得通過，但政府一樣唔做嘢。議員為咗令政府聽教聽話而出盡法寶，工聯會立法會議員「阿王」王國興尋日索性撐住拐杖做殘疾人士，仲掛埋隻假腳喺身，大唱《萬惡淫為首》，真係要寫個服字畀佢！

阿王一發言就企出議事廳條走廊，大唱：「福心啦，好心啦，可憐吓我哋啲傷健嘅市民啦……」可能立法會講咗九年政府都唔聽，所以佢愈講愈激動，甚至一邊講一邊揮舞佢支拐杖。其實阿王嘅上身表演已經唔係首次，講長者牙科福利就出動假牙，上禮拜三宣讀施政報告時又放籃生果象徵生果金，但原來籃生果係臭㗎，真係難為坐佢前面嘅議員。

另外，尋日嘅辯論破天荒有手語翻譯員企喺議事廳內，為坐喺公眾席嘅聽障人士翻譯，據提出呢次議案要用手語翻譯嘅立法會街工議員梁耀忠講，因為手語都係語言，而公眾席唔可以講嘢，所以翻譯員被安排企喺議事廳。