政情：三港人增補為全國政協

全國政協常委會尋日起一連三日喺北京舉行會議，今次會議其中一項議題，就係通過增補政協委員名單。據聞名單上有二十三個候選人，港區佔三人，包括人稱「才女」嘅立法會議員「IQ博士」黃宜弘太太梁鳳儀、九龍社團聯會理事長兼九龍城委任區議員王惠貞，同埋廣東社團總會副會長兼沙田區議員簡松年，名單將會喺呢個禮拜五獲正式通過。

梁鳳儀唔使多介紹，佢係「勤＋緣」媒體服務有限公司創辦人兼行政總裁。至於王惠貞就係廣西壯族自治區政協常委，曾獲政府委任為公民教育委員會成員，其後更獲委任為九龍城區議員。簡松年則為執業律師，○五年同全國政協委員王國強等一班專業人士創辦香港專業人士協會，現為協會主席，做咗廣東省政協委員十四年。

至於內地嘅增補委員，亦有政商界同宗教界名人，包括國務院前總理朱鎔基女兒朱燕來、貴州省省長林樹森、中國佛教協會會長傳印長老、銀泰百貨集團董事長沈國軍等。