政情：長毛寸林公公係火星人

立法會尋日開大會，有議員問政制及內地事務局局長「林公公」林瑞麟，點解可以容許外國駐港領事館或者官方機構喺立法會功能界別選舉中投票，但無論啲議員點問，林公公都只係重複又重複咁話呢個安排合乎《基本法》同香港法例，加上呢啲外國機構對香港經濟同社會有貢獻，所以並冇打算改變呢個安排。

林公公將「人肉錄音機」嘅本色發揮得淋漓盡致，簡直技驚四座。不過，班議員就似乎唔係好滿意，當中以同林公公有唔少牙齒印嘅社民連「長毛」梁國雄最啜核，見到林公公死都唔肯正面回應，即時揶揄佢好似喺火星返嚟咁，聽唔明人哋講乜之餘，答嘅嘢亦都冇地球人明佢講乜。

林公公冇畀長毛嚇窒，竟然讚長毛形容得好生動，不過依家科技仲未可以將人送上火星再帶返地球喎。長毛反駁話雖然唔可以帶人上火星，但可以帶畜牲喎。唔知長毛咩意思呢？