政情：肥亨睇新樓盤呻買唔起

施政報告穩定樓市措施軟弱無力，好多業主都坐地起價，基層同中產人士置業難上加難。聽聞中策集團主席馬時亨最近都貢去新界一個新樓盤睇樓湊熱鬧，感受吓樓市嘅癲況，佢話唔睇猶自可，一睇就嚇親，事關樓價貴到離晒譜，聲稱連佢都買唔起喎！

其實，肥亨食米又點會唔知價吖，更談唔上「買唔起」三個字，只係佢見個單位建築面積二千幾呎，但實用面積只得千幾呎，名副其實係「發水樓」，十足海參浸水發大，最弊係一間賣成二千幾萬元，物非所值。佢坦言揸住四百萬美金，喺外國任何一個城市，都可以買到又大又優質嘅靚樓，所以佢睇完之後都要打退堂鼓。

肥亨警告話豪宅炒到咁貴，有啲似九七年樓市高峰嘅氣氛，樓市泡沫正在形成，遲早出事，究竟冧唔冧市同幾時冧市，主要睇利息走勢，呢方面佢就冇水晶球嘞，只能呼籲大家小心啲，做好風險管理，量力而為，冇咁大個頭就唔好戴咁大頂帽。至於股市方面，佢話恒指距離最高峰三萬幾點仲好遠，但炒風熾熱，又係形成緊泡沫，小心為上喎！

前日傍晚六點鐘喺中環ifc商場撞到肥亨，見佢同幾個銀行家朋友傾偈，大約五分鐘後離開，之後一路行一路講電話，非常繁忙。佢話最近好忙，周身唔得閒，事關要諗吓點樣搞好間公司喎！自從中策集團收購南山人壽失敗後，股價迅即插水，都應該搞搞佢喇！