政情：罐王畀哈爾濱員工考起
政情：罐王畀哈爾濱員工考起
喺內地投資要兼顧好多嘢，有「香港罐王」稱號嘅廠商會第一副會長羅富昌，尋日出席黑龍江書畫精品香港展覽時話，佢旗下永富容器集團五年前將業務拓展到哈爾濱，睇中當地乳業嘅龐大發展潛力，主力生產奶粉罐，雖然生意好好，但訓練員工就好考耐性。
佢話喺哈爾濱同廣東沿海投資好唔同，廣東省好早對外開放，營商文化接近香港，但哈爾濱位處內陸偏遠寒冷地區，大部分人才都係國營企業培訓出嚟，營商思維及手法同南方好唔同，加上好少港人願意去當地打工，所以佢要適應當地文化外，仲要花好多耐性訓練當地員工，依家廠房聘請約二百五十人，要訓練晒都唔簡單。
喺哈爾濱有投資嘅羅富昌，尋日抽空出席黑龍江書畫精品展。