政情：搞搞政：周一鑊被窒參加選舉瘦身

曾經減過肥嘅民協立法會議員馮檢基，尋日喺立法會會議提出口頭質詢，話香港肥胖學童嘅比例愈嚟愈高，要求政府做多啲嘢解決呢個問題。有「周一鑊」之稱嘅食物及衞生局局長周一嶽就解畫，話政府一直都認為應該喺宣傳教育方面着手，仲話依家有啲局長同議員身形比較大件，希望大家都以身作則，努力收身。

立法會主席聽到周一鑊咁講，忍唔住潤番句：「我哋立法會嘅議員係肥而不癡嘅。」其實數落，局長之中身形最大件嘅咪周一鑊自己囉，唔知佢又有冇以身作則瘦吓身呢？

匯賢智庫立法會議員葉劉淑儀對於周一鑊嘅回應唔多滿意，同周一鑊講如果想瘦身，最好就係參加選舉，因為參選一定瘦。葉劉仲提議政府應該效法美國部分州份，對一啲垃圾食物徵稅。

葉劉呢項建議牽涉政府收入同業界利益，咁複雜嘅問題，一向奉行唔做唔錯原則嘅周一鑊又點會考慮吖，即刻耍手擰頭，猛話認為透過教育同宣傳做比較好。至於一啲涉及稅務安排或者強制嘅措施，要等研究咗現有措施成效先考慮喎。