政情：毓民袋巾傑玩火自焚

早前都同大家講過，策動變相「公投」嘅社民連同公文袋，累政府要花公帑搞立法會五區補選，仲累街坊搞到立法會內多個事務委員會同一啲公職要補選，五個辭職議員歸晒位後，社民連嘅黃毓民同公文袋嘅袋巾傑又要霸番喺立法會政府帳目委員會個位，諗得好理想喎！

協調機制有暗湧

建制派同泛民主派就各事務委員會嘅正副主席有一貫嘅協調機制，而喺帳委會內都有一定比例，泛民佔三個位，毓民同袋巾傑辭職後，泛民就搵咗兩個替工頂住先，諗住重返議會後再填番個位。

嘩！邊有咁着數㗎！喺建制派嘅攔截下，泛民呢個如意算盤當然打唔響。白鴿黨嘅張文光早前同建制派講數，重申跟番之前嘅協調機制，要求建制派支持毓民同袋巾傑選番入帳委會，但建制派負責協調機制嘅議員講到明，話建仔唔會派人去爭，但若果有其他建制派議員參選嘅話，就會支持建制派嘅人選。

建制派不嬲都反對變相「公投」，若果支持毓民同袋巾傑返入帳委會咪等於支持變相「公投」？當然係要政治正確啦，否則咪即係自摑嘴巴，倒番轉頭畀泛民抽後腳勁插就大鑊喇！

賠了夫人又折兵

呢次泛民真係企咗喺度唔知點算，事關泛民喺帳委會嗰兩個替工，諗住喺聽日嘅內務委員會提出辭職，再將兩個位「自動轉帳」畀毓民同袋巾傑，依家唔知建制派會唔會搵人補位，若果有嘅話，替工又走咗，仲隨時冇埋呢兩個位，到時就真係賠了夫人又折兵嘞！

據聞，泛民依家唔上唔落，全部hold住，話遲啲要喺內會前嘅飯盒會商討對策。毓民話，若果影響泛民喺帳委會人數嘅比例，佢寧願唔選；而其中一個替工亦話，若果會益到建制派嘅話，咁就要考慮吓係咪辭職喇。

嗱！公社兩黨點火推變相「公投」，依家好明顯係火燒身，玩到自己仲玩死埋泛民自己友添！睇吓佢哋到時點收科。