SUN世代：ICQ剋星朝朝起身想返工

「每朝一起身就好想返工！」這句話對打工仔可能難以置信，但卻出自微軟線上業務掌舵人朱會泳 （Leslie）之口。他年少時對電腦一見鍾情，萌生「互聯網夢」，立志以資訊科技為終生事業，輾轉在多間知名企業從事互聯網工作，七年前他終於加入夢寐以求的微軟（Microsoft），上任首年即擊敗當時網上稱霸的ICQ。覓得Dream Job的Leslie說：「當興趣變成事業，工作就可以成為快樂泉源！」

回想二十多年前初次「邂逅」電腦，這位IT奇才仍記憶猶新。他初中時成績好，獲父親送贈人生第一部電腦，他興奮地說：「嗰個年代冇乜人有電腦㗎，覺得電腦真係好犀利，做到好多想像唔到嘅嘢！」從此Leslie愛上電腦，更迷上互聯網，認為它能發揮無限想像空間。後來在澳洲留學的他考入大學，為減輕父親負擔，竟把心一橫，放棄最愛的電腦科：「我間大學嘅電腦科全國排名數一數二，好難合格，我怕要嘥錢重讀，惟有揀市場學，但個心始終喺電腦！」

畢業後第一份工，是在富邦銀行當市場部助理經理，看似與資訊科技無關，卻因Leslie對互聯網的熱衷，令他初嘗用網上資源工作。他手舞足蹈說：「當時第一代Flash剛誕生，啲字同公仔可以喺電腦度飛嚟飛去！嗰時覺得好得意，所以即刻報課程去深造！」他的熱誠獲老闆賞識，派他負責用Flash在網上宣傳。「雖然要額外工作係辛苦啲，不過係自己興趣，好開心！」

崇拜Bill Gates科技改變世界

當時他早上工作，晚上讀書，又考取多個證書，裝備自己，○一年科網潮爆破，他無放棄理想，輾轉在不同知名企業從事網上工作。○三年他入職中電，負責網上電費單業務，卻陷入事業低潮：「中電嘅文化好謹慎、唔冒險，我鍾意創新，意見成日不被認同，好似冇價值！」至○四年機會終於來到，「全球最大科技企業微軟搵我過檔，我一口應承！Bill Gates係我偶像，崇拜佢用科技改變世界！」

Leslie擔任微軟線上業務的掌舵人，當時ICQ雄霸全港，而MSN市佔率只得一成，但他反視之為更大發展空間，決心力谷MSN。他找出ICQ的缺點，發現它在港全無宣傳，於是遠赴美國總部要求研發中文版MSN，結果推出後港人用家飆升。他不斷改良並推出嶄新服務，上任首年便率領MSN擊敗ICQ成為一哥！Leslie說：「諗到我創作嘅嘢，可以改善港台一千萬用戶甚至下一代嘅生活，好有滿足感！」

朱會泳 Leslie Chu 小檔案

年　　齡：38歲

婚姻狀況：已婚，育有一子

學　　歷：於澳洲完成學士及工商管理碩士學位

現　　職：微軟線上服務事業群總經理—台灣、香港暨澳門

工作經驗：曾於富邦銀行、中華電力集團、Yahoo!香港擔任要職