政情：KK訂定木架放亞運火炬
政情：KK訂定木架放亞運火炬
廣州亞運火炬前日傳到深圳，工聯會立法會議員KK黃國健都有份擔任火炬手，點解？KK話因為工聯會喺內地深圳、廣州同東莞三個地方都有設立諮詢服務中心，當局預留咗三個火炬手名額畀佢哋，結果工聯會派咗佢、理事長吳秋北同埋副理事長李麗貞「出征」。
KK負責跑第四十一棒，為確保接棒萬無一失，佢仲特登早咗一日上深圳「上堂」，原來做火炬手都有好大學問，尤其係點火嗰刻，一個唔小心可能會燒着頭髮，跑嘅時候仲要就鏡頭，不時要望住宣傳車等睇直播嘅市民見到火炬手正面，加上支火炬成一公斤重，要舉住跑一百米都唔係容易。不過KK話佢一向有做運動，所以冇乜難度，仲講笑話未熱完身就已經跑完一百米，好似唔係好夠喉！
由於亞運火炬手可以擁有支火炬，所以，KK話遲啲會去訂造一個木架，然後將佢支火炬拎番工聯會辦公室好好存放。
黃國健前日做亞運火炬手，話一啲難度都冇。 圖片由工聯會提供