政情：梁君彥慳家專掃減價呔
政情：梁君彥慳家專掃減價呔
經濟動力立法會議員Andrew梁君彥係製衣廠老細，自有一套衣着品味。早前佢戴咗條粉橙色、上面滿布小星星圖案嘅Celine靚呔出席電子業商會酒會，問佢揀領呔心得時，Andrew好謙咁話：「趁減價時買㗎，幾百蚊一條啫！」佢又話名牌領呔郁吓千幾蚊一條，佢覺得好肉赤，所以通常趁大減價時入貨喎！
Andrew對領呔顏色同圖案有高要求，顏色至緊要柔和，佢屋企有好多粉紅色、黃色同淺藍色領呔；當日戴住嗰條Celine粉橙色靚呔都夠晒特別，閃閃星星嘅圖案好有童趣。由於要求多多，Andrew鍾意自己買領呔，牌子唔拘，但絕對唔會假手於人，太太都唔例外。
不過，Andrew都忍唔住呻今時今日名牌領呔實在太貴，佢仲話，一件衫先至賣幾百蚊，但一條名牌靚呔要成千幾蚊，惟有大減價至出動掃貨，真係數口精嘅廠家。
梁君彥戴住條Celine閃閃星星靚呔，減價後只需幾百蚊。