政情：褲王準備接棒掌中總

中華總商會係本港四大商會之一，嚟緊禮拜五（廿二日）係佢哋換屆之期，中總內部傳出，會長蔡冠深將冧莊一屆，做多兩年會長，「褲王」楊釗就守得雲開，內定隔代接棒，一嘗會長滋味。中總喺立法會嘅代表「IQ博士」黃宜弘會同蔡冠深一齊喺二○一二年退下，接任立法會議員嘅人，暫時以「新金王」黃英豪看高一線。

蔡冠深冧莊多一屆

中總早前選出新一屆常董，四十九名常董本周五選出新一屆會長同八位副會長。消息透露，經過一番內部醞釀後，中總敲定蔡冠深冧莊做多一屆，之後由「牛仔褲大王」楊釗接任。

消息仲話，中總會喺四十九名常董中揀選立法會代表，今次除咗重視名望外，仲要求新人年輕化、喺業內有一定江湖地位，上任後仲要能瞓身議會工作，早前傳出廖長江係黑馬。

不過，據講廖長江話做議員就無問題，但要佢完全放低大律師生意有難度，所以無法跨過中總嘅新門檻，另一個熱門人選就係港區全國政協委員黃英豪。