政情：洪丕正嘉年華沖淡負能量

好多人都話香港人怨氣大，呢啲負能量點樣先可以減少？渣打香港行政總裁洪丕正認為，一啲有益、集合一家人投入嘅嘉年華活動，既可以成為一種文化藝術活動，又可以吸引遊客來港，以創意帶來歡樂，更有助沖淡社會嘅負能量。

渣打搞嘅馬拉松已經成為本港一年一度盛事，仲成為堅毅、挑戰嘅代名詞，近年佢哋又大搞「渣打藝趣嘉年華」，今年嘅活動定於十一月十三至十四日喺維園舉行。渣打香港自○一年以來，一直支持青年藝術協會舉辦「渣打藝趣廣場」，○八年更搬到維園舉行，愈搞愈大，參加人數亦由最初嘅幾百人增至去年嘅四萬人。

洪丕正話，嘉年華文化喺亞洲地區唔係好流行，要帶起氣氛，要一步一步嚟，佢去過英國諾丁山同美國新奧爾良感受當地嘅嘉年華氣氛，人哋一家大細參加，全城投入，喺條街載歌載舞，吸引埋隔籬地區人士飛去睇，可惜亞洲嘉年華會文化氣氛好淡薄，香港更處於起步階段。