政情：有西九龍董事唔做 日專家吼M+筍工

西九文化區管理局尋日公布最新一份年報，雖然仲喺設計階段，但文化區嘅人手編制同薪酬開支都急速膨脹。文化界近日更傳出消息，話做過兩年西九管理局董事嘅日籍博物館專家長谷川祐子今年冇獲續任做董事，原因同佢有意申請出任西九M+博物館第二把交椅有關。據講，呢個年薪超過百萬港元嘅筍工專管M+博物館營運，可以發揮長谷川祐子嘅專長，所以佢有董事唔做，寧願紆尊降貴做打工仔。

嫌日本飛港開會辛苦

來自西九管理局嘅消息話，長谷川祐子係日本嘅博物館專家，早在○八年已被港府委任做西九管理局董事，為香港提供專業意見，過去兩年，佢每次開會都要由日本專程飛過來，雖然係咁，但出席會議嘅比率好高，上個禮拜港府委任新董事，長谷川祐子竟然榜上無名，引來唔少董事局成員詫異。

事隔幾日，我哋八到原來呢一切同長谷川祐子嘅個人決定有關，局中人話，長谷川祐子唔做董事有兩個原因，一係佢嫌日本飛香港開會太辛苦，唔玩；二係有意做M+博物館嘅第二把交椅，直頭落手落腳搞博物館，所以咪唔做董事囉。據講兩大原因又以後者嘅可能性較高。

做李立偉副手人工高

咁即係話，長谷川祐子好可能成為M+博物館候任行政總監李立偉嘅副手，到時本港M+博物館兩個掌舵人都係外籍人士，可以吸引外籍文化界精英嚟香港做嘢，亦可見管理局畀嘅人工幾有吸引力啊！難怪口痕友講笑，M+唔止係現代藝術咁解，仲有「Money +」嘅意思。

尋日嘅年報就透露，舊年西九員工開支高達二千零廿五萬元，當中有一千八百多萬係人工、津貼同福利，最高薪僱員暫時係由政府借調去西九嘅發展項目總監，年薪二百六十幾萬。西九多位高層如行政總監以及行政總裁都係埋數之後先上場，年報未反映佢哋嘅人工，否則一定水漲船更高。