政情：區會變身林公公一味靠拖

白鴿黨轉軚支持政改方案，其中一個要求係要政府一併取消區議會委任制，點知政改方案獲得通過後，正所謂過咗海就係神仙，政府過橋抽板，不斷放風話只會分階段取消委任制，幾時同分幾多階段取消都唔肯講實。

政制及內地事務局局長「林公公」林瑞麟尋日出席立法會政制事務委員會會議時，就被議員追問相關事宜，佢只係話今個月尾會提交政改方案本地立法嘅草案，至於取消委任制係會分開處理嘅。

啲議員三番四次咁問即係幾時呀？林公公仍然做好佢「人肉錄音機」份工，都係話係分開處理嘅，但加多句：「因為有先後次序㗎嘛！」咁講，即係又拖啦！

為咗堵塞變相「公投」、議員辭職再參選嘅漏洞，政府正研究立法，專業會議嘅議員梁美芬追問草擬法例嘅進度，林公公話有關研究做得七七八八㗎喇，依家仲喺處理當中，若果準備就緒就會出台。

吓！點為之準備就緒？咁即係幾時呀？佢又係重複嗰句「準備就緒就會出台」。嘩！好明顯佢一味拖啦！