政情：安德魯王子推廣英優勢

英國約克公爵安德魯王子尋日以英國國際貿易及投資特別代表身份訪港，英資龍頭大行滙豐銀行尋晚喺中環總行四十一樓搞私人雞尾酒會歡迎呢位貴賓。

私人酒會喺傍晚六點開始。五點半左右，政府保護要人組（G4）開始喺附近主要通道同商場來回巡邏「掃雷」，保安唔敢怠慢。到六點四十分，安德魯王子由大約十名G4簇擁保護下，直達進入滙豐總行。

酒會七點三十分結束，安德魯王子經原路返回酒店，其後酒會賓客亦魚貫離開。英國皇室成員嘅私人酒會，外人不得越雷池半步，馬會行政總裁應家柏話出席賓客約有五十人，以生意人為主，安德魯王子喺儀式中作簡短發言，講到英國同香港嘅關係。咁係咪第一次見安德魯王子呀？原來佢哋五、六年前喺英國已認識，只係酒會人多，佢未有機會同王子打招呼。

安德魯王子今次訪港，重點推廣英國喺建築、設計、工程以及金融服務業嘅優勢，所以尋日下晝已經率先會晤本港部分大地產商，留港期間仲會見煲呔曾同財政司司長鬍鬚曾，又會出席英商會午餐會，同英港商界領袖同退伍軍人協會代表會面，行程相當緊湊。