政情：卓永與丟官離奇蒸發

官場音樂椅又再轉動，政府尋日突然宣布由財經事務及庫務局副秘書長（庫務）梁卓文下月六號接替卓永興擔任食物環境衞生署署長，新聞稿只係提到梁卓文嘅資歷同公職，卓永興嘅去向就一句都冇提到，令人覺得今次調動好離奇，卓永興去向成謎，好似人間蒸發咁。其實卓永興領導嘅食環署一片混亂，問題一大堆，依家先被叮走，算遲啦！

可能冇部門收留

卓永興做得好唔好，大家有眼睇，過去三年佢統領嘅食環署管理混亂，劣迹數極都數唔完，例如食環署職員經常被人踢爆蛇王、街市空置率又長期高企，浪費公帑；佢做署長期間，連老鼠都惡過人，周街咬遊客，破壞晒香港嘅國際形象；擦鞋匠、雪糕仔都被佢欺壓到冇啖好食；控煙執法一鑊泡，加上滅蚊又不力，搞到傳染病到處散播……總之瓣瓣都唔掂，數極都數唔晒，卓永興早就應該被叮走，冇得留低。

好嘞，卓永興終於要調離食環署，奇就奇在政府唔交代佢調去邊喎。公務員事務局就話佢會先放假，下一個職位將會分開公布。消息話佢唔係離開政府，只不過係調職，可能冇乜部門有興趣收留佢，費事佢帶埋啲散漫嘅風氣同低能嘅作風過去啩。而政府有人事調動，但唔公布被調走嘅人下一個崗位，呢個做法非常罕有，睇怕要搵份工畀卓永興，公務員事務局都有排張羅，佢今次嘅長假，一定係有排放。

梁卓文接任署長

至於接任署長一職嘅梁卓文今年四十四歲，年紀好輕，佢八七年七月加入政務職系，做過前政務總署、前布政司辦公室、前教育統籌局等，○三年至○七年出任工業貿易署副署長，其後任職庫務局。佢最近一次現身係喺五月港鐵股東大會，有位婆婆喺會上忽然大鬧政府身為港鐵大股東，但負責運輸嘅鄭汝樺同負責財務嘅陳家強就唔見人，現場身為政府代表嘅梁卓文即刻企起身，為政府拆彈，令阿婆順番條氣。

公務員事務局局長俞宗怡尋日力讚梁卓文有出色嘅領導以及管理才能，但就半句都冇提卓永興過去嘅表現，咁嘅舉動，已經講明咗一切啦！